وشك زى البدر من هلات ولا انتفاخ

السلام عليكم ورحمة الله وبركاته

جيالكم بوصفة خلاصة تجربتى طازة

هى كوكتيل من وصفة مامتى ربنا يديها الصحة
ومن خبيرة التجميل مس ملك
ومن كتاب الطب البديل

كل واحدة فيهم قالت لى على مكونين من المكونات ديه عشان حاجة معينة فانا فقولت احطهم كلهم على بعض واشوف
واكيد لو مش هيفيدونى مش هيضروا بشرتى

نقول بسم الله الرحمن الرحيم

زيت لوز مر او حلو بس الافضل المر
عسل نحل
كبسولات فيتامين E
زبادي

عملت منهم ماسك نهار وكريم ليل

ماسك النهار
معلقة عسل نحل ( معلقة الشاي )
معلقة زبادي
كبسولة فيتامين E
3 نقط زيت لوز
اخطيهم على بعض هو هيكون سايل شوية بس اهم حاجة ضيفي الزبادي شوية شوية لحد ما يوصل انه يكون سايل بس متماسك يمسك فى وشك مش هيسيح
افرديه على وشك وحوالين عنيكي واسترخى فاردة ضهرك على السرير او الكنبة لمدة 20 دقيقة او نص ساعة واشطفى وشك بمية فاترة يعنى لا دافية ولا ساقعة ونشفى وشك بفوطة بطريقة التربيت .. بلاش تفركي وشك فى الفوطة ارحمي خلايا وشك هههههههههه

كريم الليل
نفس المكونات بالزبط بس من غير الزبادي
هتفرديه على وشك كولو ونامي لحد الصبح ولما تصحى اغسلى وشك عادي

نصايح هامة

- لو هتستخدمي زيت اللوز المر خليكي حريصة قوى وانتى بتفرديه حوالين عينك عشان لو دخل عنيكي هيحرقك وهتلتهب وفى الحالة ديه تغسليها فورااااا بمية ساقعة وكذلك ميجيش على شفايفك

- لو استخدمتى زيت لوز حلو العكس تماما حطي من التركيبة بتاعة كريم الليل على رموشك وشفايفك الرموش هتتقل وشفايفك هتبقى حريييييير ووردى

- بالنسبة بقة للوقت اللى هتحطي فيه ماسك النهار
ياريت تستغلى ال 20 دقيقة دول فى انك تشغلى موسيقى هادية وتسترخى شوية خدى نفس عمييق وطلعيه بهدوء
دا مفيد جداااااااا لانك هتتخلصى من اى توتر والاسترخاء فى حد ذاته مفيد جداا لتجديد خلايا وشك

- كريم الليل تقدرى تستخدميه كل يوم ماسك النهار مرتين او 3 كل اسبوع
عايزة اقولكم الانتفاخ تحت عنيا والهالات خفت كتييييييييير ومامتى الخطوط اللى نازلة من عند الانف حوالين الفم ديه شدت تانى ومبقاش عندها تجاعيد وكذلك حوالين عنيها مفيش تجاعيد نهائي هتحسي وشك طري وزي الحرير ومع الوقت هيتوحد لونه وهيبقى وردي

جربوها وهتدعولى من غير ما اطلب
منقول